قصة الفقيه و الجنية فرمضان

شوية وقفوا حدانا هادوك الرجال، دوك الطوال، أنا عرفتهم جنون ماشي بنادم. وقفوا قالوا لي: "تبعنا". يلاه تحركت، هما يهضروا مع ديك الجنية قالوا لها: "تسناي هنا". قالت لهم: "وخا". أنا بقيت كنتلفت وكنشوف فيها بغيت نقول لها: "يلاه معايا" ولكن ماقدرتش. قال لي واحد من دوك الرجال: "تبعنا". تبعتهم بقينا غادين بين الشجر، شوية وصلنا لواحد الدويرة كتبان غير صغيرة. قالوا لي: "أجي دخل". في اللحظة اللي دخلت ليها عاود تصدمت، شفت ديك الدار كبيرة داخل وخا هي كتبان غير صغيرة، ماشي داخلة تحت الأرض، هي بصح كتبان صغيرة فيها شي بيت ولا جوج، ولكن في اللحظة اللي كنفوت الباب ديالها كيبان لك التيساع وكيبان لك بنادم داخل بزاف. عاودوا قالوا لي: "تبعنا". تبعتهم، تميت غادي، دوك الناس اللي كاينين الداخل بقاو كيشوفوا فيا، وأنا كنت هاز اللوحة حيت رجعوها عليا وكنت مزير عليها مزيان. بقاو كيتمشاو بيا حتى داوني لواحد البيت، كان نفس البيت اللي كنت مشيت ليه، كيبان مظلم وفيه الشمع، كانوا ثلاثة الشمعات وكان الظل، ولكن ما كانش غير واحد، كان ظل على اليمن وظل على اليسار وظل مقابل معايا، كان مقابل مع كل شمعة ظل، ولكن كيبان نفس الشكل. هضر معايا قال لي: "صالح ادخل". أنا تخلعت حيت ما قلت لحتى واحد سميتي صالح، حتى ذاك الجنية اللي كانت معايا ما قلتهاش ليها. هو يقول لي: "ادخل ما تخافش". دخلت، هادوك الرجال اللي كانوا معايا خرجوا بقيت غير أنا وياه. قال لي: "قرب حدايا". مشيت قربت من دوك الشمع، مرة كنسمع الصوت جاي من جهة الظل، ومرة كنسمع من ظل آخر، المهم كل مرة منين كنسمع. سولني قال لي: "واش أنت ولد فلان؟" (قال سمية جدي). قلت ليه: "لا راه جدي". قال لي: "أه أنت ولد بنته؟". قلت ليه: "أه". قال لي: "واش كتعرف الوالدة؟". قلت ليه: "كنعرفها". قال لي: "كنعرفها ملي كانت صغيرة ولكن دابا ما بقيتش شفتها". قال لي: "واش بصح مريضة؟". قلت ليه: "أه". قال لي: "مالها؟". قلت ليه: "ماعرفتش باش مريضة ولكن شحال هادي وهي مريضة، وغير مؤخراً عرفت باللي واحد الناس هما اللي سحروا ليها". قال لي: "باش عرفتي؟". قلت ليه: "أه راه قالتها ليا واحد الجنية، وحتى هي قالت ليا باللي مرضوا لها باها، وقالت ليا نطلب منك تعاونها". قال لي: "فين هي هاد الجنية؟". قلت ليه: "راه خليتها في البلاصة اللي تلاقيت مع دوك الثلاثة". بدا كيعيط، عاود وقف واحد من دوك الثلاثة، قال ليه: "عيط على ديك المرأة اللي كانت معاه". هاداك الواحد بقى واقف، هو عاود هضر معاه قال ليه: "غير سير سير عيط عليها". هضر معايا ذاك الظل قال لي: "أنا ما مولفش كنتلاقى مع شي واحد، غير حيت أنت كنعرف جدك، وجدك عاونا بزاف ذاكشي علاش الحاجة اللي بغيتيها غادي نعاونك فيها، حيت اللوحة حنا اللي عطيناها ليه". قلت ليه: "واش أنت هو ملك الجن اللي سميتك مكتوبة هنا؟".