الفصل الخامس
فاش دوا معايا بديك الطريقة جاني انهيار عصبي ماقدرتش نصبر باقي، بابا قاليا هاد الهدرة كاملة تصدمت . مشيت كنبكي عند الام ديالي اوهي تقوليا " سمعي ابنتي البنت المصير ديالها هو الزواج ليوم ولا بعدو غادا تزوجي يعني معندك فين تهربي ، او هاد الراجل لي بغاك مزيان، راه هادا عام تقريبا باش دوا باباه مع باباك او كان باقي صغير". وهي كتهدر مابقيتش كنسمع ليها وليت ذابلة فبلاصتي بحال شي جثة بلا روح تمنيت الموت، لاني ديما كنت كنتخيل غادا نتزوج بشيواحد كنبغيه وكنعرفو ومن مستوى ديالي وقاري ماشي عروبي
بابا كيموت على البلاد وكيموت على عائيلتو اللي فالبلاد ديما كيمشي عندهوم فاش كنت صغيرة، وفاش كبرت كندوز الصيف عند خالتي في كازا وهو وماما كيدوزوه فالبلاد. حاولت نهدر معا بابا باش يتراجع على القرار ديالو، باش غير يفهمني لاش لاحني لواحد فهاد القرينة الكحلة.
قالي: هادشي لي كيصلاح ليك
قلتلو: والقراية ؟
قالي: آشمن قراية لافاك سكنتي فيها 6 سنين مالك كاتقراي الطب!
قلتلو بغيتي تزوجني واخة نتزوج ولكن ماشي واحد من هنا من المدينة وآنا قابلة بيه، وايلا مابغيتيش غادا نتاحر، ولا عرفتي آشنو غادا نتزوج بيه وماباقيش تهدر معايا. ماعرفت واحد التصرفيقة منين نزلات عليا ديال الواليدة، حتى هي ماعجباتهاش هضرتي. غوطات عليا: باك ابنتي لي وقفتي قدامو وخرجتي فيه عينيك وقلتي هاد الهدرة لي ماشي من ترابينا، دار عليك لي مايدار وفاش شافك غادة تزلقي وضيعي من ايديه بغا يسترك، ماتلينا قدرنا عليك، كبرتي وعليتي علينا